رامز جاب من الآخر الحلقة 12.. ميدو : محدش يقدر ينافسني في المزز وإمام عاشور : لو رجع بيا الزمن هروح الأهلي (فيديو)
وقع الإعلامي الرياضي أحمد حسام ميدو ضحية لحلقة اليوم من برنامج “رامز جاب من الآخر”، الذي يقدمه الفنان رامز جلال عبر قناة MBC مصر، مع لاعب الأهلي إمام عاشور.
وقدم رامز جلال ميدو بطريقته الساخرة قائلا: “ضيفنا الثاني إعلامي رياضي شهير، بيطلع الهوا بجلابية كإنه قاعد على السرير، عامل فيها حكيم وواعظ وعمال يدي حكم ومواعظ، عمره ما كان حيادي، وطول الوقت بييجي مع نادي على حساب نادي، أين المصداقية والمهنية، ده مش شغل إعلاميين ده شغل كبابجية، معانا ومعاكم المحلل الكلبوظ واللاعب النرفوز، صاحب اللبس الغريب وأقوى صفقات الخطيب”.
وبمجرد لقائه مع ميدو، سخر رامز من إطلالته قائلا: “عامل قصة الساموراي، طيب فين السيف؟ وهو ده القميص البلوفر”.
وخلال حواره في البرنامج، سأل رامز ميدو عن تكرار اختراق حساباته على مواقع التواصل قائلا: “كل ما تحب تغلط في حد تقول حسابي اتسرق”، ليرد ميدو بقوله: “مرة وحيدة حسابي اتسرق فعلا، والباقي كله أنا اللي كاتب”.
وسأله أيضا: “إبراهيموفيتش ضربك قبل كده، وهل الخناقة دي كان فيها مزز؟”، ورد ميدو قائلا: “أنا اللي كنت هموته، ومفيش حد في العيال دي يقدر ينافسني في المزز، والمزز كانوا بيدوني دفعة أبقى كويس”.
أما إمام عاشور، فسخر رامز من إطلالته قائلا: “إيه التسريحة دي يا إمام، إستايل ويجز جامد”.
كما سأله رامز: “ميدو بيقول إنك بعد ما رجعت من الدنمارك روحت له وعيطت علشان ترجع الزمالك”، ليرد إمام عاشور: “لأ طبعا هو اللي كلمني”.
وقال رامز جلال في حديثه لإمام عاشور: «لو رجع بيك الزمن هتفضل في الزمالك ولا هتروح الأهلي؟» ليرد اللاعب مؤكدًا على اختياره للانتقال للقلعة الحمراء.
رد ميدو على إجابة عاشور، قائلًا: «إمام زملكاوي وعائلته كلها زملكاوية، مفيش حد لعب في الأهلي والزمالك محبش الزمالك أكتر».
من جانبه، رد إمام عاشور على ميدو مؤكدًا: «والله أهلاوي ومليش دعوة بعائلتي».
ويشهد برنامج “رامز جاب من الآخر” الذي يذاع يوميا عقب أذان المغرب كالعادة أجواء من الرعب والتشويق والإثارة تجاه الضيوف، وقد أثار البرومو ردود أفعال إيجابية من جمهور ومُتابعي النجم رامز جلال في مصر والوطن العربي، نظراً لما احتواه من مشاهد تجمع بين الرعب والكوميديا في الوقت ذاته بسبب المغامرات المُثيرة وغير المتوقعة التي تواجه النجوم الذين وقعوا في فخ رامز.
